სოციალურ მეცნიერებათა დოქტორი, პროფესორი ვალერი მოდებაძე, განსახილველ გამოცემაში იძლევა მოკლე, მაგრამ ყველაზე მნიშვნელოვან, არსებით ცნობებს რუსეთ-ჩეჩნეთის დაპირისპირებისა და მის გამომწვევ მიზეზთა შესახებ. ნაშრომში მიმოხილულია ჩეჩნეთისა და რუსეთის ურთიერთობათა ისტორია, რუსეთის პოლიტიკა კავკასიაში და კერძოდ ჩეჩნეთში, ჩეჩნეთის ისტორიული და თანამედროვე ურთიერთობები საქართველოსთან და, ზოგადად, ისტორიულ-კულტურული კავშირები მეზობელ ქვეყნებთან, ჩეჩნეთის თვითგამორკვევის საკითხი და მის მიერ დამოუკიდებლობის მოპოვება, ინგუშეთის გამოყოფა ჩეჩნეთის შემადგენლობიდან, ჩეჩენი ხალხის ბრძოლა თავისუფლებისათვის მეფის რუსეთის, საბჭოთა კავშირის დროს და მისი დაშლის შემდგომ ხანებში, და ის მოვლენები, რამაც გამოიწვია ჩეჩნეთის პირველი და მეორე ომი და ტერორიზმის წარმოშობა ჩეჩნეთში. მოკლედ არის დახასიათებული ჩეჩნეთის თავისუფლებისათვის მებრძოლი ეროვნული გმირები და პრეზიდენტები და მათი ღვაწლი სამშობლოს წინაშე. გამოცემას ერთვის ილუსტრაციები და ჩეჩნეთის ეროვნული ჰიმნის ქართული თარგმანი. წიგნი იოლად აღსაქმელია და ერთი ამოსუნთქვით იკითხება. განკუთვნილია მკითხველთა ფართო წრისათვის.