ან ყველაფერი, ან არაფერი!.. ეს სულისკვეთება წარმართავთ რომანის პერსონაჟებს და ამ სულისკვეთებითვეა შექმნილი მათი თავგადასავალიც, სულისშემძვრელი და ექსპრესიული. ჩემთვის, როგორც ავტორისთვის, შთაგონების მთავარ წყაროდ გასული საუკუნის საქართველოში მიმდინარე უმძიმესი პროცესები იქცა. ვგულისხმობ, ეროვნული მოძრაობის ჩამოყალიბებას, აღზევებასა და მოღალატეობრივად დამხობას. უმძიმეს მენტალურ, სოციალურ თუ კულტურულ კრიზისს და ჩვენი ქვეყნისთვის ერთ-ერთ ყველაზე მძიმე, მტკივნეულ თემას, აფხაზეთის ომს. "მზითშობილნი“ მხატვრულ-ფილოსოფიურ ჭრილში გვიყვება იმ ადამიანების ისტორიას, რომლებიც საკუთარი ოცნებისთვის ბრძოლას შეეწირნენ. რომანი თავისუფლების, ჰუმანიზმის და პატრიოტიზმის იდეალებზეა აგებული.