როგორ მოვაგვაროთ კონფლიქტი, რომელი სტრატეგია ავირჩიოთ მოლაპარაკებისას, რა უფრო ეფექტურია? მოლაპარაკება თუ დაპირისპირება. წიგნის პირველი ნაწილი ის აუცილებელი მინიმუმია, რომელიც უნდა ვიცოდეთ კონფლიქტის შესახებ. მეორე ნაწილი მოლაპარაკებების წარმოების პრაქტიკულ მხარეს მოიცავს და ასევე ეფუძნება ჩემი მასწავლებლის, პროფესორ როჯერ ფიშერის მიერ შემუშავებულ მეთოდიკას. კონფლიქტოლოგია შეისწავლის კონფლიქტის წარმოშობის, განვითარებისა და დასრულების, ასევე გადაწყვეტის პრინციპების კონსტრუქციულ მოწესრიგებას. კონფლიქტი ყველა ცოცხალი ფორმის თანამგზავრია, იგი ნორმალური ცხოვრებისეული ფაქტორია, რომელიც, მოგვწონს თუ არა, იყო, არის და იქნება. ამიტომ მნიშვნელოვანია, ადამიანის ეს თანმდევი მოვლენა გავითავისოთ და ვისწავლოთ მისი მართვა. ურთიერთობას თან ახლავს კონფლიქტი. იმისათვის, რომ შევძლოთ კონფლიქტების მოწესრიგება, აუცილებელია გვესმოდეს, რა მექანიზმების გამოყენებით არის შესაძლებელი კონფლიქტის მართვა. როგორ ვისწავლოთ მოწინააღმდეგე მხარის სწორი აღქმა, შეფასება, შესაბამისი მოქმედება და საბოლოო ჯამში ისეთი შედეგის მიღწევა, რომელიც ორივე მხარისთვის მისაღები იქნება. სწორედ ამის შესახებ გვექნება საუბარი.